Казакстанда COVID-19 илдети күч алды. Кыргызстанда абал кандай?
Саламаттыкты сактоо министрлиги июнь айынын аягында өлкөдө, тагыраагы, Бишкекте коронавирус илдети кайра катталганын кабарлады. Буга чейин апрель айынан бери COVID-19 илдетинен жабыркагандар каттала элек болчу.
Маалым болгондой, 27-июндан 3-июлга чейин (Саламаттыкты сактоо министрлиги статистикалык маалымат аптасына бир жолу берилерин эскертет) 48 адамдан коронавирустун белгилери аныкталган. Анын ичинен үчөө ооруканага жаткырылып, абалдары орто оор деп бааланууда.
COVID-19 менен жабыркаганы аныкталган 9 адам Орусиядан, Түркиядан, Өзбекстандан жана АКШдан келишкен. Республиканын башка аймактарында ооруну жуктуруп алгандар катталган жок.
Ал арада коңшу Казакстанда дагы коронавирус илдетине чалдыккандар көбөйүп, бүгүнкү күндө бейтаптардын саны 1 миллион 307 миңден ашканы айтылды. Буга байланыштуу карантиндик чектөөлөр кайрадан киргизилип жатат деп жазышат казак басылмалары.
