Алымкадыр Бейшеналиев жардамчысы медициналык окуу жайды кантип "бир бөлмөдө" ачканын айтты
Саламаттыкты сактоо министри Алымкадыр Бейшеналиев жеке медициналык университеттерди жабуу демилгеси боюнча Kaktus.media сайтынын түз эфиринде комментарий берди.
"Бир жыл мурун бизди кара тизмеге киргизип коюшкан. Министр катары бул үчүн мен жооп беришим керек болчу. Анткени кара тизме биздин дипломдорубуз эч жерде таанылбайт дегенди түшүндүрөт. Андан чыгуу үчүн эксперттер менен чогуу төрт университетти тизмеден чыгардык. Калгандары жөн эле бизнес, абдан чоң жана жеңил акча. Мисалы менин жардамчым бир, эки бөлмөнү эле университет кылып ачты. Ага чет элдиктерди кабыл алып, 3 миң доллардай алган. Бул пакистандыктар, индиялыктар же Ош базарында же башка жерде бизнес кылгандар. 6 айда бир, экзаменден өтүш керек болгондо келип, кайра эле бизнесин уланта беришет", - деди Саламаттыкты сактоо министрлигинин башчысы.
"Көк боор кайда экенин билбесе оорулууларды кантип дарылайт? Каалаган студенттерден сурасаң деле билишпейт, ага 100% ишенем. Элестеткиле, 10-15 жылдан кийин сен экөөбүздү боор, көк боор, уйку бези кайда экенин билбеген бүтүрүүчүлөр дарылайт. Ал эми бул медициналык окуу жайларды ачкан олигархтарды студенттери дарылабайт. Алар чет өлкөдөн дарыланышат", - деп кошумчалады Бейшеналиев.
Анын айтымында, президент Билим берүү министрлигине жана Коопсуздук кеңешине анын мүнөзүн билип туруп көрсөтмө берген. Университеттер аткарбай жатат, бирок мен жабам. Коомчулук мени сындап баштады. Ошол үчүн мен комиссия түздүм, аны журналисттер видео менен көрсөтүп беришет. Бүгүн Жалал-Абад медициналык университети текшерилет. Анан дароо интернеттен көрсөтүшөт", - деди саламаттыкты сактоо министри.
Бейшеналиев белгилегендей, бүгүнкү күндө үч университет бардык стандарттарга жана талаптарга жооп берет. Алар Медициналык академия, КРСУ жана ОшМУнун медициналык факультети. "Алар буга чейин эле текшерилген. Үч жолу текшерүүгө барышкан", - деди ал.
