Таш-Көмүрдөгү 4 адамдын өлүмү. Милиция өрттүн болжолдуу себебин айтты
Жалал-Абад облусунун Таш-Көмүр шаарында турак үйдөн өрт чыгып, бир үй-бүлөнүн 4 мүчөсү каза болгон. Облустук ички иштер башкармалыгынан өрттүн алдын ала себеби иштеп турган кондиционер болушу мүмкүн дейт.
Белгилесек, 11-августта кечки саат 18:00 чамасында Таш-Көмүр шаарынын Панфилов көчөсүндөгү үй өрттөнүп жаткандыгы тууралуу милицияга кабар түшкөн.
Бул факты боюнча топтолгон материал каттоого алынып, тергөөгө чейинки текшерүү иштери башталган.
Териштирүүнүн жүрүшүндө өрт чыккан үйдө 1961-жылы туулган М.Н. жана анын неберелери - 2015-жылы туулган Б.А., 2014-жылы туулган Э.А., 2018-жылы туулган А.А. бөлмөлөрүндө уктап жаткан жеринде каза болгондугу аныкталып, жансыз денелери күйгөн абалда үйдөн чыгарылган.
Учурда каза болгон адамдардын өлүмүнүн себептерин аныктоо максатында соттук-медициналык жана өрттүн келип чыгуу себебин аныктоо үчүн өрт техникалык эспертизалар дайындалып, текшерүү иштери жүргүзүүлүдө.
Өрттүн болжолдуу себеби - кондиционердин иштеп жаткандыгынан улам болушу мүмкүн деп айтылууда.
Башкы беттеги сүрөт иллюстрациялык: dotshock.
