Трампка эл менен жолугушуу учурунда ок тийип, жарадар болду
АКШнын мурдагы президенти Дональд Трамп Пенсильваниянын Батлер шаарындагы шайлоо алдындагы митингде жарадар болду. Ок саясатчынын оң кулагына тийген. Жашыруун кызматтын агенттери аны курчап, сахнадан алып кетүүгө жардам беришкен.
Трампка ок чыгарган адам иш-чаранын өзүндө эмес, коңшу имараттын чатырында болгонун укук коргоо органдары айтышты. Батлер округунун прокурору Ричард Голдингер ок аткан адам чатырда болгонун жана "бир нече жүз ярд" алыстан атканын ырастады. Шектүүнүн жанынан жарым автоматтык МАНЧ-15 мылтыгы табылган.
Окуянын кесепетинен каза болгондор бар - Батлердин райондук прокурору митингге келгендердин бири каза болуп, дагы бир адамдын абалы оор экенин айтты. Ок аткан адамды жашыруун кызматтын кызматкерлери өлтүрүшкөн. Шектүүнүн өздүгү тууралуу азырынча маалымат жок. Кийинчерээк эки адам жабыркаганы, алардын абалы оор экени белгилүү болду.
Жашыруун кызматтын өкүлү Трамп окуядан кийин "коопсуз" экенин билдирди. Трамптын шайлоо компаниясынын өкүлү экс-президент "жакшы" экенин жана жергиликтүү медициналык мекемеде текшерүүдөн өтүп жатканын айтты. Ал окуядан үч саат өткөндөн кийин ооруканадан чыгып кеткен.
АКШ президенти Жо Байден Дональд Трамптын шайлоо алдындагы митингинде экс-президентти аткандарды айыптады. Ал Трамп жана анын үй-бүлөсү үчүн тиленип жатканын айтып, Трампты коопсуздугун камсыздаган жашыруун кызматка ыраазычылык билдирди.
