Матраимов менен Ражабалиевдин ордуна. Жаңы депутаттарды шайлоо эки округда өткөрүлөт
Жогорку Кеңештин депутаттарын кайра шайлоо эки бир мандаттуу округда өткөрүлөт. Бул тууралуу Борбордук шайлоо комиссиясынын мүчөсү Абдыжапар Бекматов маалымдады.
Анын айтымында, кеп буга чейин депутат Искендер Матраимов менен Нурлан Ражабалиев мандатын тапшыруу боюнча арыз берген Кара-Суу жана Баткен райондору тууралуу болуп жатат. Ал Жогорку Кеңешке партиялык тизме менен шайланган депутат мандатын тапшырса, мандатын кийинки талапкер ээлей турганын эске салды. Эгерде мандатын бир мандаттуу округдан болсо, ал жерде кайра жаңы шайлоо өткөрүлөт.
Бирок шайлоонун так датасы азырынча белгисиз. Абдыжапар Бекматов түшүндүргөндөй, алар президент тарабынан дайындалгандан кийин эки айдын ичинде ишке ашат. Бул жол-жобо шайлоо мыйзамында каралган.
Буга чейин Борбордук шайлоо комиссиясы Жогорку Кеңештин депутаты Искендер Матраимов менен Нурлан Ражабалиевдин ыйгарым укуктарын мөөнөтүнөн мурда токтоткон.
