Бишкекте ири өлчөмдө пара алганга шектелген райондук судья үй камагына чыкты
УКМК тарабынан сот тутумундагы коррупциялык көрүнүштөргө бөгөт коюу боюнча пландык иштердин алкагында 21-октябрда Бишкек шаарынын Свердлов райондук сотунун судьясы ири өлчөмдө пара алган деп кармалып, УКМКнын тергөө абагына киргизилген.
Коопсуздук комитеттин маалыматы боюнча, Бишкек шаардык сотунун кылмыш иштери боюнча коллегиясынын судьясы И.Н.А. 27-сентябрда камакка алынган. Ал ата-энесинин камкордугусуз калган жашы жете элек баланы эркиндигинен ажыратуу менен байланышпаган биринчи инстанциядагы соттун өкүмүн күчүндө калтыруу үчүн адвокаттын жардамы менен опузалап акча талап кылганга шектелип жаткан.
Бул факты боюнча тергөө иштеринин жүрүшүндө Бишкек шаарынын Свердлов райондук сотунун судьясы А.А.А. жашы жете элек баланын жакын тууганынан адвокаттын ортомчулугу, ошондой эле жардамчысынын жана катчысынын жардамы аркылуу эркинен ажыратуу менен байланышпаган жазаны берүү үчүн пара алганы аныкталды.
Учурда сот тутумунун арасында ушул сыяктуу фактыларды аныктоо жана бөгөт коюу боюнча пландуу иштер жүргүзүлүүдө, анын жыйынтыгы боюнча кошумча маалымат берилет.
Биринчи Май райондук сотунан билдиришкендей, 23-октябрда соттун чечими менен Свердлов райондук сотунун судьясы Акылбек Адимов үй камагына чыгарылган. Ал тергөө кызматташуу келишимин түзгөн жана жакынкы аралыкта сот деген макамынан ажыратылат.
