Бийликти басып алууга чакырык жасаган деп айыпталууда. УКМК Олжобай Шакирди камакка алды
Олжобай Шакир бийликти күч менен басып алууга, массалык баш аламандык уюштурууга чакырганы үчүн УКМКнын убактылуу кармоочу жайына камалды. Бул тууралуу УКМКнын имаратынын жанында анын жактоочусу Бакыт Афтандил журналисттерге билдирди.
Анын айтымында, Олжобай Шакир саат 17:00дө кармалып, УКМКнын тергөөчүлөрү аны укук коргоо кызматкерлеринин талаптарына баш ийбей, бийликти басып алууга аракет кылган жана массалык баш аламандыкка чакырган деп айыптоодо. Жактоочулар мунун баары негизсиз айыптоолор экенин, бул абсурд жана Олжобай Шакирдин өзү дароо бошотулушу керектигин кошумчалады.
"Эртең Биринчи Май райондук сотунда анын күнөөсү жок экенин далилдеп, аны бошотууга аракет кылабыз. Тергөөнүн жыйынтыгында кандайдыр бир экспертизалар дайындалып, экспертизанын корутундусунун негизинде кылмыш иши козголду", - деди жактоочу.
Олжобай Шакир сот тарабынан анын баш коргоо чарасы тандалганга чейин 48 саатка Улуттук коопсуздук мамлекеттик комитетинин убактылуу кармоочу жайына киргизилди.
