Активист Өндүрүш Токтонасыров бүгүн да сурак берүүгө чакырылды
Жарандык активист Өндүрүш Токтонасыров бүгүн, 1-июлда ИИМге сурак берүүгө кайра барды. Бул ирет ал жактоочулар менен барганын, кечээ адвокаттын жоктугуна байланыштуу сурак токтотулганын Гүлгакы Мамасалиева Facebook баракчасына жазды.
Ошондой эле Токтонасыровго 30-мартта 330-берене менен иш козголгонун кошумчалады.
Ал эми Токтонасыров өзү журналисттерге 30-июнда ИИМдин Башкы тергөө башкармалыгында саат 23:00гө чейин суракка алынганын айтты. "Расалык, улуттар жана аймак аралык кастыкты козуткан пост жазгансың" деп айтышты", - деп комментарий берген.
Белгилесек, 30-июнда чак түштө активист Өндүрүш Токтонасыровду жарандык кийимчен төрт адам Лесное айылынан ак Жигулиге салып кеткени кабарланган. Кийин ал ИИМдин тергөө башкармалыгында болгону белгилүү болгон.
