Электр энергияга болгон тариф эми жыл сайын өзгөрөт
Кыргызстанда электр энергиясынын тарифи эми жыл сайын өзгөрөт. Бул тууралуу "Улуттук энергохолдинг" ишканасынын жетекчиси Талайбек Байгазиев 11-майда өткөн маалымат жыйында билдирди.
"Тариф мындан ары бир жылда бир жолу өзгөртүлүп турат. Быйылкы 2023-жылдын өзгөрүүсү азырынча ушул, андан башка жогорулоо болбойт. Өнөр-жай абоненттери үчүн өзүнчө коэффициенттер бар, ал такталат. Андан башка болбойт", - деди Байгазиев.
Белгилей кетсек, учурда мамлекет электр энергиянын 1 кВт саатын 2 сом 28 тыйындан сатып алат. Бирок калк ошол эле 1 кВт саат үчүн 77 тыйын төлөчү. Буга ылайык, 1-майдан тартып Кыргызстанда электр энергиясынын тарифи 23 тыйынга жогорулаган. Калк үчүн бир кВт/саат тарифи 77 тыйындын ордуна 1 сом болду. Эгер бир айлык керектөө 700 кВт/сааттан ашса, 2 сом 16 тыйын болот.
Аз камсыз болгон үй-бүлөлөргө жеңилдетүү каралган. Ал эми ишкана, мекеме, уюмдар үчүн башка тариф колдонулат.
Кыргызстан учурда электр энергиясы эң арзан алдыңкы 10 өлкөнүн катарына кирет.
