Кемпир-Абад иши. Сот айрымдарын үй камагына чыгарды
Бүгүн, 12-апрелде Биринчи Май райондук соту Кемпир-Абад боюнча кармалган активист, саясатчылардын бөгөт чарасын карап жатат.
Саат 15:40ка карата сот залынан Кемпир-Абад суу сактыгычын коргоо комитетинин координатору Мамбетжунус Абылов үй камагына чыкты. Ал ден соолугуна байланыштуу 2 айга үй камагына чыгарылганын белгиледи.
Андан кийин сот экс-депутат Асия Сасыкбаеваны 20-июнга чейин үй камагына чыгарды. Ал Кемпир-Абад иши боюнча айыпталуучу бойдон калды.
"Менде белгилүү бир чектөөлөр бар жана интервью бере албайм. Бирок мен өзүмдү күнөөлүү эмесмин деп эсептейм", - деди Сасыкбаева.
Ошондой эле Клара Сооронкулова, БШКнын мурдагы мүчөсү Гүлнара Журабаева, активисттер Улукбек Маматаев, Таалайбек Мадеминов, ооруканада жаткан Чыңгыз Капаров да үй камагына чыкты.
Эске салсак, 2022-жылы 23-октябрда опозиция саясатчылары, активисттер коомдук баш аламандыкты жаратууга шектелип кармалган. Андан бир күн мурун Кемпир-Абад суу сактагычын колдоо боюнча комитет түзүлгөн.
27-октябрда кармалган активисттер соттун чечими менен эки айга СИЗОго киргизилип, алардын камактагы мөөнөтү узартылган.
