Пакистанда күчү 6,8 баллга жеткен жер титирөө болду. Жүздөн ашуун жабырлануучу бар
21-мартка караган түнү очогу Афганстанда болгон жер титирөө учурунда Пакистанда күчү 6,8 баллга жеткен жер титирөө катталып, кеминде эки адамдын өмүрүн алды. Бул тууралуу Dawn маалымат порталы жазып чыкты.
Хайбер-Пахтунхвадагы табигый кырсыктарды башкаруу башкармалыгынын 21-марттагы билдирүүсүндө чатырлар, дубалдар жана үйлөр урап, эки киши каза болуп, дагы алты киши жаракат алган. Облуста онго жакын үй жарым-жартылай жабыркаганы айтылат.
"Анткен менен Сват районунун полиция кызматкери Шафиулла Гандапур эки адам каза болуп, 150 киши жарадар болгонун билдирди. Ал кошумчалагандай, алар Саиду атындагы окуу ооруканасына жөнөтүгөн", - деп айтылат билдирүүдө.
Күбөлөрдүн айтымында, кеминде 30 секундага созулган катуу жер титирөө Пакистандын көп аймактарында сезилген.
"Эл үйлөрүнөн чуркап чыгып, куран окуп жатышты", - дешет окуяга күбө болгондор.
Жердин термелүүсү Пакистандын Исламабад, Пешавар, Лахор, Равалпинди, Кветта, Кохат, Лакки Марват, Дера Исмаил Хан, Түштүк Вазиристан жана башка аймактарында да сезилгени белгиленди.
Премьер-министр Шахбаз Шариф Табигый кырсыктарды башкаруу улуттук башкармалыгына жана башка мекемелерге ар кандай өзгөчө кырдаалдарга даяр болууга буйрук берди.
Эске салсак, Нидерландиялык сейсмолог Фрэнк Хоугербитс Пакистанда 2023-жылдын март айында күчтүү жер титирөөлөрдү болжолдогон. Түрк сейсмологдору дагы чоң баллдагы жердин титирөө мүмкүнчүлүгү жогору экендигин бир нече жолу айтышкан.
